في مساك

في مساك ..
أسأل ولا نكهة جواب ..
لامتى أنفاسي تصاعد بك لهب ..
وتلمس أركان السما ..
وأمطر ظما ..
ويجف من حلقي عتاب ..!

في مساك ..
أحياك موت وأمنيات ..
وكل كلمة قبرها في خاطري ..
عيّت تبات ..!
تدري أن الصوت قوت ..
في زمن لي الذراع ..
وفي زمن ضحك البشوت ..!

في مساك..
أتعكز الغربة..
ولا أدوّر رضاك ..!
وانت من بدّ الحبايب..
عشت غايب..
والرضا بيدك وقيدك ..
له سؤال بكل ليله :
كيف أدوّرني معاك ..؟

في مساك ..
يعيش حالم ..
بين كف الحظ وكفوف السؤال ..
ويرتمي بينه وبينه ..
ويصفق كفوفه وجل ..
ويطّاير الحلم الحلاااال ...!!

علمتني أنك أنا

علمتني كيف أسهرك ..
كيف أغزل عروقي بساط من الحنين ..
ولا أطير ..!
علمتني كيف أنتظر ..
كيف أختصر عمري ..
عشان الكلمتين ..
أيه أحبك ياثمين ..!
علمتني معنى المطر ..
لاجف بعروق المسا ..
وتقاطر الحزن الوفير ..!
علمتني أنك أنا ..
وأني معك أول ..
ولا يمكن تسميني أخير ..!
علمتني أن الزمن ..
ماله ثمن..
ماله عبير..
وأن الحكاية كلها..
أرواح في غيمة سما ..
تمطر جفا..
واحنا على باب الصبر ..
نكتب : تعبنا ياضمير ..!
علمتني معنى الوفا ..
وعلمتني أني لحالي بالبشر ..
مالي خشير..!
علمتني معنى انصهاري ..
واختياري ..
لابكيته..
لاكسرت الكسر ..
والناتج كسير ..!
علمتني علمتني علمتني ..
وآآآنا تعبت آعلمك ..
أن الجناح اللي خبرته ..
أنكسر في خاطري ..
ويصعب عليّ آجبّره ..
وآآقول لك يمكن نطير ..!

ترويض ليله

تفاح / همسة غيم / ترويض ليله ..

هي كل مايمكن نسميه ضوضاء

أما الغريب اللي مضيّع دليله ..

 الحلم فـ ايدينه عصا تقطر الماء ..! 

بعض الليالي دمعتك مستحيله .. 

وفي بعضها دمعك على خد الأنواء

لاتستعير من الفرح مايخيله .. 

عمر الفرح مانستعيره بالأشلاء 

روض غروب الحال وجنون خيله .. 

وخلّ الأمل يرسم على البال ماشاء

أنت الوحيد اللي تهامل حصيله ..

 وانت الغريب اللي تسامى بالأجواء ..

عذّب مراسيل الرضا بالفتيله ..

 واشعل حنينك لاتباطيت من جاء

الغربة اللي تعترف بك وسيله ..

 أهون من الغربة على صدر رمضاء ..! 

أنثى

أنثى وتمطر به سماه ..
أنثى على حد السهر ..
هي فارقة والغيم مابلل نحر ..
والصبح فيها جمر ..
عيّا يرتوي جمر الحياة ..!...
أنثى يحنيّها القمر ..
ماتنحني إلا لرب العالمين ..
ثم الغيوم الطارقة صدر الزهر ..
سرّ وجهر ..
وتقول أنا كلي نهر ودي رضاه ..!
أنثى على جال السهر ..
طيشه مداااه ..
متماسكه ..
متمالكه شعب الحنين ..
ولا ملك غير اشتياق ..
ونبض ملحه في حلااااه ..!
أنثى ..!
ويتمادى العطا كل العمر ..
قيمة صبر ..
والحلم يتغنى عنّا ..
ماله سوى عض السنين ..
ولثغة الحب وأساااه ..!
أنثى ..!
سواليف ومطر ..
كانت ولا زالت مفاتيح البداية ..
والنهاية حلم صاحي ..
مرتوي عثرة رماحي ..
يهدي المجنوووون آآآآه ..!
أنثى..!
وشوق العالمين..
بصدرها ينبت عمر داخل عمر ..
واللي نسى وشهو العمر..
هو حلم يلقى ريحته فيها..
ويلقى أمنيات النور في ماضي صباااه..!
أنثى ..
وغيمه سارحه ..
متسامحه..
ماتعرف الوان البشر..
لون المطر هو لونها..
وغصونها فتنة على حد العروق ..
تثور به تطلب وطن من غير جاه ..!
أنثى ..!
من عيون السما ..
كانت ظما ..
راحت ظما ..
وتوسد القلب المكان ..
وراااح يبني حلم في كل إتجااااه ..!!!!!

وش أخيرك

وش أخيرك ..!
واولك مايشبه إلا طير ..
رفرف بالفرح ..
غنت سماه ..
ولا قرا صمتك ..
ويسمع آهتك ..
يشهق زفيرك ...! ......
وش أخيرك ..؟
والليالي تشبه الما..
عطر سلمى..
تذكرينه..؟
مانسيت ولا نسيتي ..
وأنتي أصلا ذاكرة روحي..
وروح الما ..
سفيري قبل مايصبح سفيرك ..
وش أخيرك ..؟
والفضا سبحة حنين ..
وشوقي الوافي أسيرك ..!
أستخيرك ..
ترتوين الما من عيون الزمان المرّ ..
من قلبي ..
ومن عزة أميرك .....
وش أخيرك..؟
والسنين تمرّ عجله ..
كنها جمرة وفا..
تهدي سعيرك ..!
وش أخيرك ..
وأنتي أول في حسابات المطر ..
وش عاد ياروحي أخيرك ..؟؟ ...

لاتسأليني

لاتسأليني وين أنا .. 

ألمسي كف الفياب وألمسك .. 

أنا هناك .. 

أتأمل جنون السنين العابثة .. 

واتنفسك ..!

لاتسأليني عن عذر ..! 

ماعاد بي غير اغتراب .. 

وتمتمة صمت .. وصبر ..!! 

وش عاد باقي بالعمر ..؟؟

لا تسأليني عن حنين ..! 

هذا المسمى مايبعثرني .. 

ولايهدي الشقا للعاشقين..! 

هذا معناه الممات الحي.. 

في فوضي تلم اليأس.. 

في راحة يدين ..!

لاتسأليني عن مساي .. 

وعن صباحي .. 

بينهم يتم وغرابة .. 

بينهم عمر وأماني .. 

تنتهي في كل يوم .. 

وتبتدي في كل ليله .. 

والجمر زاد اقترابه ..!

لاتسأليني عنك ..! 

هذا أصعب سؤال .. 

أسأليني عالمحال .. 

وتعرفينه .. 

ياحزينه .. 

مابقى لليل فينا .. 

أي معنى للسؤال .. 

وكل مابي تقتلينه ..!

شمس الافلاك

سلمتني غيمة بليا عناوين ..
وأدميتني بالظل ياشمس الأفلاك ..

لو المشاعر تنكتب بالملايين ..
ماكان غيري يكتبه فدوة رضاك ..!

أنت المطر في هيئة انسان من طين ..
وأنت الضيا مايكتمل غير بحماك ..

علمتني معنى الفرح دون تلوين ..
وعلمتك أن الماء هو سرّ مجناك ......
لو النهار يعيد تعريف الأيدين ..
تلقى اليدين جناح والصدر مأواك ..

مير البلا بين التفاصيل تنوين ..
وليت الصبر يقرا ويفهم نواياك ....

خذني على كف الرضا دون تخمين ..
تلقاني أوفا مـ الوفا / هات يمناك ..

شكل مدار النور في سلة التين ..
واكسر مرايات التعب صبح يرواك ...

عطني وطنك آزلزله بالمجانين ..
وأعلمك معنى العقل لا تحراااك ..

هذا أنا مندوب حظ المساكين ..
أكرم عيوني لجل يكرم محياك ......

أنت الوطن وآنا غريب العناوين ..
إلى متى والدرب ضايع برجواك .......

العطا سرّ الالوان

جرب تعيش الخارج اللي بداخلك ..

 لاتقتل الإنسان في داخل إنسان

خذ من قيود الفكر موضع تساؤلك ..

وطيّر حمام البال لاكنت طفشان ..!

عامله باحساسك ولو مايعاملك ..

ماهو مهم انه يجافيك باحسان

كل المهم انك تعامله باجملك ..

العمر لوحة والعطا سر الألوان ..!

لاتلتمس للعذر موطن يجاملك ..

الحرّ ماعمره دنا فوق خسران

خلك وحيد ولا تنافرت بأولك ..

آخرك يهديك الرضا حب والحان ..!

هذا زمان الموت محدن بسألك ..

خذ الجواب اللي عليه الزمن لان

افرد جناح الرغبة اللي تمولك ..

سماك حضنك والأمل فيك جنحان ..

الليل غيمٍ ماسقى بك تأملك ..

والصبح نورٍ مالمح سرج وعنان

فك القيود اللي بصدرك تزملك ..

واحذر تبيع الورد لو كان ماكان

ماقلت لي

ماقلت لي ..
راح العمر ماقلت لي ..
وش أخرك ..؟
دام الحنين بأولك ..
ليه المسا فاضي ..
وصدري ممتلي ..!
ماقلت لي ..
خذ من حكايات النهر ..
عطر وسهر ..
بس قلت لك ..
بآخذ حكايات الصبر ..
وأتعلمك ..
يمكن تحنّ وتنجلي ..!
ماقلت لي ..
من يحمل أغصان الطموح ..
يحيا بفم السالفه ..
كله رضا ..
تشبه حياته مقتلي ..!
ماقلت لي ..
أنك بعيد بلا وريد ..
إلا حلفت أنك معي ..
في مدمعي ..
وانا على جالك ..
تعبت أسأل وريدك : أنت لي ؟؟
ماقلت لي..
وين الخطا؟
دام الخُطا يمك تسوق عروق..
يمك تعتلي.!
ماقلت لي..
إنك سما وآنا الأراضي..
لاشكت نوض الغياب.
وكسر التاريخ فيها معولي ..!

أمي

أمي ..

وينساني الكلام ..

وانسى الأنا ..

ويصير كلي مرتبك ..

واصبح بليا فم لاجيت أكتبك ..!

أمي .. مساحة كون ثاني ..
مايكفيها المكان ولا الزمان ..
هي وطن واكثر وطن ..
يجتاحني وآآآلقى أماني ..!

أمي .. ويتمادى العطر ..
خمر وكلام ..
وأغنيات ..
أمي شموس العالمين ..
في ضيها ..
تزهر جميع الذكريات ..!

أمي .. وكل الناس من دونك ..
تعب وافلاس..
أنتي لحالك..
كنتي النور الغريب..
وكنتي الكون الرحيب ..
اللي تسامى ..
لانبض قلبي بجالك ..!

أمي .. ويغتال الكلام أغلا الكلام ..
وكل ماصففت حرف ..
يعيد لي نفس السؤال :
وش بينصف عرقي المجنون في حبك ..
وفي وافي خصالك ..؟؟؟

أمي .. ويتعطل لساني ..
عن حنانك..
عن مداك..
وعن خصالك ..
عن حياتك..
عن كفاحك..
عن جراحك..
عن عيوني ياعيوني ..
ياوطن طهر وأماني ..!

أمي وطن ماله وطن إلا بصدري ..
وهيّ تدري ..
أنها كانت وطن ..
وعاشت وطن ..
ولازالت بعطر الحنين ..
تعيدني في صدرها طفل بشجن ..!

امي حكاية روح ..
عاشت روح ..
تكتبني سهر ..
كل العمر ..
كانت تصفف كل أمانيها على صدري ..
وتعزف لي الأمان ..
وتهدي احساسي ثمر ..!

أمي سوالف من فرح ..
ورد انطرح ..
هي كل ما أملك من دروب الأمل ..
ورد وعسل ..
هي كل تعريف الحياة ..
وكل تعريف الخجل ..!

أمي أغاني شمس في حلق الظلام ..
ويقصر بحبي لها كل الكلام ..
هي أجمل الأجمل ..
وروح الما ..
وتعريف التسامي والغرام ..!

أمي وتنزل دمعتي..
لاجيت أبكتب عنك..
وآنا منك..
عشت أروي مساحات الفراغ..
بكل مايمكن يكون من السما..
ياروح روح اللي ظما..
عيشي معي غيمه ومااا

أمي وينسااااني الكلام ..!

أحرار قيّدنا الحنين

أحرار قيّدنا الحنين

 .. ولا ثمين.. إلا عيونك..!

كيف أخونك

وأنتي الشمس وغناتي ..

وانتي الصمت وشفاتي

 .. وأنتي عيوني وذاتي

 .. وأنتي احساس الحياة

أحرار قيدنا القهر ..

صوت الصبر .. غصة غريق ..!

دمعة حنين بحورنا .. و

حضورنا مثل الغياب

 .. ولا عتاب إلا على موت الطريق ..!

أحرار قيدنا الحزن ..

واحنا مزن ..

عيّا عليه الوقت لايمطر هنا ..

والمشكلة أنك أنا ..

واللي بقى غربة بلا أية ثمن ..

مرّ الوطن ..!

أحرار قيدنا الحنين..

وأحيانا قيود القهر..

وأحيان قيد من الحزن..

القيد حق ولا ملاااام..

إلا على وقتٍ غبي..

ماطيّر الفرحه مع أسراب الحمام ...

آآنا المطر

كسر الخواطر مالقى له ناهي ..

والحزن مايرحم وطيشك يبقى ..

إلى متى وانت الحبيب الساهي ..

وإلى متى واحضاننا ماترقا ..؟؟ ......

الغصة اللي عالقة بشفاهي ..

خذها دخيلك واعتق اللي يشقا ..

كوب الفرح ماهو بكوب الشاهي..

إلى متى بتحدني عالفرقا ..؟؟؟.....

غنيت لك صادق بلحنٍ باهي ..

وارخيت جفني لجل حبك يسقا ..

ماطعتني فيني وعذرك واااهي..

حبك بحر وآآنا شتات الغرقا ..!!!...

آآآنا المطر وآآنا وحيد أشباهي ..

مالي شبيه إلا الحزن والورقا ..

آآموت وأحيا والمطر هو جاهي..

والشمس صوتي والحنايا زرقا ..!!!....

قصة

كتبت لك في جدر الأيام قصه .. والجدر عاش ومات به حلم عشاق

ماكنت أدوّر بالسما أي غصه .. حتى لقيت فراق يبكي على فراق

فراق حلمن ضاع بالعمر فصه .. وفراق قلبك بعد ما كان ترياق

نص العمر بانت متاهات نصه .. وباقي عروق تصيح : ياهيه مشتاق

قلبك سما وشموخ الأحرار وصه .. يعيد فيك الحلم من باب الإشراق

هذا أنا غربة وطن عااش لصه .. وأبكي على غربة حبيبي بالأعماق