خصر المستحيل

العنا والصمت / صوت المستحيل 

وابتــهالات المدى / ذلّ الرجال 

الشروق بغــــربتي ... كنه عميل 

لا تكرر...عشت تـعـريف المحال 

والليالي طعمها.... ضحكة هبيل 

يحتري القمــرا على جمر الهبال 

ياحياة الموت / والحلم النحيل 

الهداية موت / والذلّ الضــلال 

الرسن قد ملّ من صوت الصهيل 

والمطر ماملّ من حضن الجبال 

ياحبيـبه كل عمري .... لك مقيل 

العروق الشمع / والصدر الظلال 

بسّ تكفين ... الصدق لا يستقيل 

أشربيه وجربي .... طعم الوصال 

أسألك باللي جعل نبضي يسيل 

يكفي / العشــق المبطن بالحبال 

التعب سيفي / وبسمتك الدليل 

والحياة الموت ... والصمت انحلال 

الصدى والصوت ... خصر المستحيل 

والعناق اجمل ... ولا ذلّ الرجال ...!!

ساعة الأوطان

لامتى والحلم بانياب الزمن 

......لاهو اللي راح أو عندي وصل 

لامتى والغربة القشرا ثمن 

..... لامتى والطير يتغذى كسل 

يارياح العمر زيديني غبن 

..... رقصّي شوك المشاعرلاهطل 

قدمي باقة عذابي في شجن 

..... يرتعش منه الوفا قبل الخلل 

اعزفي له لحن صامت ممتحن 

..... خلي القمرا تصيح من الخجل 

اطربيني حزن او معنى حزن 

..... أي حاجه لجل حاجه تكتمل 

الصدى فيني وطيري مارطن 

..... الوله رغبه وباحلامي فشل 

ياوطن تكفى دخيلك ياوطن 

.... حن لي دامي معك مثل العسل 

لاتقول اعشق تعبت من الفتن 

.... لاتقول ارقا وعزمي في كلل 

خيلي الشقرا يعاندها الرسن 

.... احتمال الفوز صفر ولاحصل 

هيه ياحلم انت باقي بالكفن 

....روح عالم غير ..أنا بزرع أمل 

ولاانتهيت ابشر نعيد لك الزمن 

.... ساعة الأوطان في كوكب زحل !! 

كاسك ياوطن

ياغـــزاله لا تمــــــلين ارشفي 

حرفي المبلي بكـــاسك ياوطن 

أشربي طهره لعــــــلك تنظفي 

زمزم الأوطان سحر اللي فطن 

ياهبـيله أنــــــصفي ثم انصفي 

غيمتك بالشام وانتي في عدن 

المطر لا جـــــا بد يره يحتفي 

يزرع المعنى ولا يعرف رسن 

سفلتي حلمي وبالحرف ارصفي 

مابقى من حـلم مدفوع الثمن 

وقـــفي ياغـــاليه في موقفي 

موتري واقف على حد الزمن 

أطبخي حرفي وباسمي خـرفي 

قبل ماتتغـــير الـوان الكفن 

لا تقولين الغــزل جوّه صفي 

كيف يصفى والمطر كله فتن 

كيف نـتحنّا بصمت ونـــحتفي 

كيف نتمايل ؟ وليه ؟ ولجل من؟ 

ياغـزاله روقـــينا واعرفي 

 وزنك اللي في خواطـرنا سكن 

أكسري عرف القصيده واصرفي 

كل شيك بــحلم آيـــل للغبن 

أرشفيني هــــمّ بالله صــنفي 

كل قطره من بحورك تـند فن 

وانثريني شمس من كوكب خفي 

وارسميني ظل يتفيا وطـــــــــن

خرافة ريح

إذا مالت غصون الليل ثمر صبحك يجي بدري 

 واذا فجر الغياب اقبل حضورك ليل مامله 

انت الساحر المشبوه وآنا اللا عب السحري 

واللعبة بدت بالغاز هدب ورموش منحله 

بدينا يوم كنت الكون وانت الريح في صدري 

 خرافة ريح أوهي عشق ولا اغصان مبتله 

سرقة روح يوم الصيد حنّ لجفلة القمري 

 والقمري نزل للعشر ينسى به شبح ظله 

هي روحين ترسم روح والأرواح ماتدري 

 حضارة روح في وقت(ن) به الأرواح معتله 

أنهار العطا فاضت وفزت بفاكهة صبري 

 نسينا الذات في لحظات كانت بآخر الدله 

لك الله يالذيذ العمر وينك كنت عن عمري 

 كل العمر من دونك نسب واوزان مختله 

جيت بليلي المعتوه نار(ن) في سما فكري 

 سنا حرفي شبابه فيك غصب اجيه وادله 

غصون اليل ماملت تحن وصبحها يسري 

 وانا حنيت قبل اسمع وقبل تقول ~~ عبدالله ~~

الشيوخ

يامتاهات الجروح السرمدية في فضا شكواي غنيتك لحن 

واللحن صامت سمعه اقرب بعيد وبعدها اعلنت الوداع 

من يوادع من ؟؟ وانا حالة غريب يعيش في آخر زمن 

فيه طيب وفيه ذيب ... وفيه حسرات الوفا صارت خداع 

ملني حرفي ومليت الحروف اللي بتشهد لي ولابدفع ثمن 

الثمن تقسيط من عمري ل (شيخ العشق) من دون انقطاع 

الله اكبر كم بقلبي عشق ؟ كم حلوى ؟ وكم باقي وطن ؟؟ 

ايه باقي لي وطن للعشق ..أو عشق الوطن>> باقي انصياع 

انصياع الجرح بعد الجرح وتشد الجروح بخاطري خيمة سكن 

كل عشق آرحب بجرحه تراحــيب البخيل بضيف جاع 

حدني غيري على عشق الجروح وعشت عاشق للمحن 

امتحني ....واشعل الغربة بليل الجرح ...صرنا باجتماع 

واتفقنا وانتهى حكم القضية.....صرت طير الجرح في عزّ وغبن 

وهدّني ( شيخ الجروح ) بليل طرزه الألم قانص ضياع 

وضعت مابين الشيوخ وغربتي في رغبتي شيخ انطعن 

في مداهيله يردد لحن ..... كم باقي عشق بعد الوداع ؟؟؟؟

الأشياء

بيني وبيني / كل الاشياء من شي 

ومابيننا من شي / ماغير الأشياء 

كل الخطى قدام / قدام لا شي 

 للخلف در / اشرب تخاريف الاشياء 

شربت طيني / وابتلش شي في شي 

 استفرغ الخاطر / تعاريف الاشياء 

غافي هموم / وساتر الهم لا شي 

 اغزل من الأقدار / تصريف الاشياء 

كل الخطايا نبض / ما تبت من شي 

 مشبوه طاهر / والتشابه بالاشياء 

لامن نويت اصير / سهله  ولا شي 

 باصير فوق / وداخلي تحت الاشياء 

مير البلا من فوق / عايش ولاشي 

  ال فوق نظرة عين / والساقط اشياء 

ياعم قلبي / داخل القلب به شي 

 إما انحره ( او) درّس اشياء باشياء 

بيني وبيني / تمتمة همّ من شي 

 شروق ذاتي / ينتظر / صبح الاشياء 

كل التفاصيل

لاسلهم الود بين اطراف جنحانه

 يطيب طعم الملوحة والغرق فالي

البحر والبر ميداني وميدانه

 بانهار طيشه ألف الكون بلحالي

يغريني الصبح لاحليت باوطانه

وطعم المسا غير لاغامرت بحبالي

الله واكبر على تفصيل جدرانه

 كل التفاصيل سكر والفضا حالي

ولامن نظرته يزيد الله في شانه

رايع وطايع وانا في حضرته والي

اذا مشى زاد نبضي هاج رمانه

 يلعب معي سامريه بعثر احوالي

المعركه في عيونه حيل طربانه

الجيش نظرات فيها ضاع منزالي

ياقوة السحر في خدين نشوانه

  شمسين عالأرض ولا خابت اقوالي

الغصن غاوي وروحه تنفض اركانه

 حمى انشطاره تعيد الأول التالي

لاطعم لالون كيف امثل اوزانه

لانا رويته و لا هو بيح ادلالي

مصيبتي كل روحي تقبل جنانه

 جنون مثله يجنن صار يحلا لي

وكل المصايب بحضنه يسعد احضانه

 هذا البحر جدّ ياجعل الغرق فالي

أنفاس الحروف

طاح حرف وقام حرف وقلت بس

 البــلا من نزعة انفاس الحروف

أمس مثل اليوم بكره مثل أمس

 بعثرة ألوان في  نفس الصفوف

ارتمي للحزن ليت الحزن حس

 وارجع اسأل هو يشوف اومايشوف

بين طيات الورق تأنيب همس

 وبيني وبيني رفوف من الظروف

انحني للآه وابصم خمس خمس

 واستلذ بحبر تفسير الطيوف

آتساءل وارجع البسني بنفس

 وانثني رغبة ورهبه بالحسوف

كل فكر آعيش به ممنوع لمس

 ولا لمست التوت قلّبت الكفوف

بين ترتيب الأنا والغير شمس

 غيري انواري وانا كلي كسوف

آتساهل وامتحن روحي بحمس

 ولابنيت الرف طاحت بي رفوف

آآآه ياتركي تعبت آقول بس

 برجع لحزني وبسأل هو يشوف

هبيل النبض

ياحزن شدّ الغيم وارقا خيوله

 مادام باقي بالسما برق ورعود

اكتب لورد العمر معنى ذبوله

 واكتب نهاية قصة الورد والعود

اكتب دخيل الجرح يرفض وصوله

 واكتب على صدر القهر عاش مفقود

اكتب حكايات العشق وانت غوله

 واكتب غريق العشق للنور ممدود

اكتب وطن عاشق وعاشق ذهوله

 اكتب تراب العشق شاهد ومشهود

اكتب وطن ولا رطن .. في سهوله

 اكتب تغنى وانحرق وانت موجود

اكتب سقاه الهم توله  بتوله

اكتب سطا تركيزها صدر مهدود

اكتب نعى الأحلام كانت عجوله

 اكتب نقص عمره بسيّد ومسيود

اكتب نساه النصر في كل جوله

 اكتب كتب حلمه على ريح وقيود

اكتب غريب وغربته من حموله

 اكتب اسيري ملّ من لعبة الجود 

اكتب هبيل النبض واهمل سيوله

 اكتب مياه ولونت وجه وسدود

اكتب سهرني  واعتبرني حجوله

 اكتب حزين وشمعته دمع مفرود

اكتب رسمه الموت عرضه وطوله

 اكتب على انفاسه ثمرهم وورود

اكتب طفل يرقا على حد قوله

 اكتب سنافي عربد بليل  جلمود

اكتب عنيد وبه صفات الرجوله

 اكتب سقاني حب واسقيته اصدود

اكتب نخى صبره ولا جاد زوله

اكتب نفاه ولا لقا منه عـبرود

اكتب دخيلك مانسى حب خوله

 اكتب يعيش ابسط من انسان مكدود

اكتب تغنى والمطر كان حوله

 اكتب نسى التوقيع والبصم محمود

ياحزن جاك الغيم وارخى سدوله

هيّا انــبسط ياعمّ صايد ومصيود

صوت الحنين

غربة ايامي مع صوت الحنين

 جرح دافي ينفتل وارقعه

لانسيت (الهمّ) قال الهم" وين ؟

 وين رايح ؟ وانت كل المعمعه

باقي بعمرك مساحات وأنين

 باقي بحظّك سنين مبرقعه

الّجهل واطي على رمله وطين

 والليالي للعزا متربعه

علّم حروفك تقول السين سين

 واطرح اللي جاي قبل تجمعه"

قلت تامر ياولد عم السنين

 الغلا لك حيل ربي شرّعه

هات سيفك جعل سيفك مايلين

 لك بروحي عشق صعب اودعه

راضي بنورك مدام النور عين

 والمدى جفن الدقايق يرمعه

عطني اجروحك وانا بعطيك تين

 والزمن يحكم مسار الأقنعه

في فراقك موت لعروق الحزين

 وفي وصالك تمر الله مروعه

سمّ صحبتنا خيانه للفطين

 واشرب المعنى معي وتجرعه

مابيدي غير حرف وله طنين

 يركع بكيفي وانا قلبي معه

بك وفيك أسدد ديوني بدين

 لاتحقق رّح .. وخلّ الأمتعه

ديني أحلامي وموت الياسمين

 والسما للروح ظل وأشرعه

والقوافي لعبها مايستكين

تحت وبل الغيم تحرث مزرعه

لعبها يا صاحبي بس لعبتين

لعبة المكشوف قبل الأربعه

شرهة العاشق

القلم والشوق واشباه الظنون

 أسرجت بعض الخيول ملعثمه

واستفاق الطير من حفر المتون

 وكل مايرقى فضاه يوسمه

بين طيات الفرح هزّ الغصون

 وامطرت دنياه ورده مجرمه

قال يا غافي على صدر الشجون

 وين حبل الشوق يالله نحزمه

قلت لجله صارت اللهفه تمون

ولجل نوره عيني أمست مظلمه

ذاك من يطغى ولاغيره حنون

ظلمه الغاوي حنان المحكمه

مانسته الذاكره لو هي تخون

 ذاكرة روحي معه قبل أزهمه

سلطة اطرافه مدى ماله عيون

  برقه ورعده بحفله مغرمه

يشربون الغيم والزحمه لحون

ومادروا عن قلب شوقه يعزمه

طيري اشرق به على ليل الفتون

 وكل مايحويه جمله مبهمه

  من يسمي شرهة العاشق جنون ..؟؟

 ومن يهد الطير قبل يعلمه ..؟؟؟

كل عيد

كل عيد نعيد ترتيب (الصفوف )

 لين ملتنا الصفوف ابلا ( ضيا )

نركب اذلال العواصف و(الصروف )

 والبحر يعشق هطول ( الأغبيا )

لالمسنا الجوف صحنا بـ (الحروف )

 ولا لبسنا الغيم قالوا (أقويا)

نستعير الشمس من بيت الظروف

 ولا تروق لهم شموس الأنديا

ودهم بالظل في نظم الكسوف 

 ودهم بالنصر بس كلمة ريا

نشرب الماضي ونصفق بالكفوف

 والجفاف يطرز الحان الحيا

من يردالصوت من هلّ الوصوف 

 وين مستر جورج عن وادي قيا 

المسافه فكر والخطوة حسوف

 لا متى بنقول محنا أسويا

لامتى والعيد عيد بلا رفوف

 لا متى والدايره خصرّ ل/هيّا

ما ربينا الطير والصقار نوف

 والحمامه من ألف تاصل ل / يا

الخيول الفايزه مثل الزروف

 العبارة والرسن بيد اشقيا 

سمّو أعياد المذله عيد خوف

 كل أسم وله مسمى واسميا

حيلتي سيلي وروحه بـ (الحروف )

 لين تنحاز الضعافه لـ ( أقويا )

كل عيد نعيـد يا شين (الصروف)

 كل عيد نعيـد محنا  ( أغبيا )

كل عيد ..!! بدايره تخشى (الصفوف )

 عيد موت..!! لطفل ما حوله ( ضيا )

سكر الوقت الغبي

ملحَ الشاهي وغرد .. كم شربت من الغبا 

.............. كل متذوق يغصّ .... بسكر الوقت الغبي 

الشوارع صوت منفى ... قيد من عاد وسبا 

.............. والمدى نورالخديعة .. والحقايق للسبي 

شمسنا ظل ومواجع .. ضيَها مرّ النبا 

............. لاسمع بالأرض قرش .. يصيح صلوا عالنبي 

من غلط لا صح دايخ .. صفقوا قالوا جبا 

............. والحلوم بنوم طاهر .. تختنق غصب وجبي 

الجبل وارتال ثقله .. كل اساطيره هبا 

............. طبعه يغالب عيونه.. يلعن الصدق  يهبي 

كم على التاريخ فارس ... والجواد اللي كبا 

............. ذاتهم بالحمل تضحك .. و العبث في منكبي 

صاحبي يقنص ويقنص ...صاحبي يقنص ضبا 

............. شوزنه تصهر وتقهر.. والجمل يرجع ضبي 

قرب الشاهي وملّح .. واذكر ايام الصبا

............. أبك وتألم وغرد .. ليتني برجع صبي

ديار الغايبين

صفف حروفك يالوجع ..واسكن ديار الغايبين

وانثر على وجه الشقا بعضي .. وبعضي يسمعك

كم قلت لك ياسيدي .. كم قلت لي .. لاتستهين

وراحت تباريح الكلام بصدر فعلك ..موجعك

لاجيت أجفف خاطري .. روحي تسوق بدمعتين

وحده لذكرى غاليه .. والثانية لجلي معك

كل الخطاوي مهمله .. تمشي ولا أدري لوين

زفة عذاب آعيشها .. والحفل غصبن يزرعك

رغباتنا ماهي لنا ..أدري ولا فيك أستعين

لكن من آداب الوجع .. تقطع رجا من دلعك

ملعون ابو جد الفرح ..ماشاف ترتيب الحنين

كل الفضا لجلك رضا ..بعيون روحي وزعك

لاغبت عنك ..أجيك فيك .. آحسني كلي أنين

ولا صحيت بهمّ جرحك .. غبت فيك آجمعك

الذاكرة صوت السهر .. والصمت صوت الصابرين

يخرب بيوتك يالجفا .. قلي من اللي شرعك

ياسدرة أحروف الوجع .. ياروح صدر الغايبين

تعالي بآخر وفا .. قولي نويت أودعك...!!!!!

بعض طين و بعض لهفه

هات روحك ..!! 

هات شماعة جروحك .. 

ماتشوفين الحزن 

يسرق لسان المدينة 

ماتشوفين الحطب .. 

يبني ويبني .. 

فالبحر صاير سفينة ..!! 

هات روحك ..!! 

هات بعضك لجل بعضي 

طفي الجمر المعتق 

في عيوني ..في عيونك 

لجل ينبت في مسانا 

طفل شوق .. وعاشق يداعب جنونك ..!! 

يابعد عمر المسافر .. 

رتبي فوضاك فيني .. 

باحتويك وباحتويني .. 

أدري أني .. 

جيت لك ماني برايق .. 

بس جيت ..!! 

جيت أمرغ أنف حزني 

في تراب الطهر .. 

في رمل الدقايق .. 

جيت اسدد لليالي بعض 

همي .. نزف دمي .. 

جيت لك فوضى حقايق .. 

جيت .. والدمعه على شباك قلبي 

همها أبقى قريب .. 

وهمي أغني واطير .. 

أيه اطير .. 

ودي أتعلا كثير .. 

في رياحك .. 

من رماحك .. ودي يسموني أهلي .. 

طير طاير بس ..أسير ..!! 

تعالي .. واسهريني 

ليل هادي .. 

كفوف وأرواح وهنادي .. 

غردي للعمر ليله 

دوري للكسر حيله 

يوم انا والحلم عشنا 

بعضنا كسراعتيادي ..!! 

عشت عمري .. 

كل عمري .. 

همّ جاي وهمّ غادي ..!! 

والغريب اللي لفاني .. 

هزني .. بكفوف ربعي 

حطم آمالي بقوه .. 

يوم كان العمر بادي ..!! 

كم وجع يتنفس الما ..؟ 

بالشوارع .. بالمدارس 

داخل احضاني ينادي ..!! 

كم سقيت الحلم نبض 

ولا ظميت إلا ودادي ..!! 

كم صباح آعيش فيهم 

واشفق بروحي عليهم 

وصوتي المبحوح فيني 

قال .. فيني 

آآآآه ياغربة بلادي ..!! 

هذا سيلك باختصار .. 

هذا هو طعمي .. وذوقي 

بعض طين .. 

وبعض لهفه .. 

بينهم كل اغترابي 

بينهم ضايع ترابي 

بينهم تعريف رجفه ..!! 

هذا انا .. 

وهذا هو .. كل اللي صار .. 

هذا سيلك باختصار 

غربته صوت انتصار .. 

دوزني موته .. بموته 

أشربي من نبض توته 

شددي عنف الحصار ..!! 

هذا تصنيف الليالي .. 

هذا تصنيفي لحالي .. 

ماشربت المرّ مره 

وماشربت السكر إلا .. 

يوم كان الملح حالي ..!! 

سكر الوقت

الدقايق ليالي والسنة عمر ثاني 

والحزن ماتخلا مير صبري تخلا

أطوي الهم طي العمر واقول فاني

يعترضني غصيبة مثل نورً تجلا 

يازمانً تغير فيك حلو المعاني 

كل ماقلت هانت قال بدري تسلا

وكل ماصافح الأحلام حلمي نساني

مالقيته معاهم واثر حلمي تغلا 

سكر الوقت مر ولا شربت الثواني 

لاح برق الألم في سقف قلبي تعلا

وامطر القلب خوف وذكريات وأماني

وقام جرح الشقا قام رحب وهلا 

كل يومي غدا ترحيب جرح وأغاني 

واصبح القلب مرقص والجسد راح صلا

المسا أنثى

المسا أنثى يفززها الوله 

والعطر سافر ..!!

طايره بجناح فوضى 

صوتها ذكرى فرح ..

وحلم طاغي .. للكرز في صدر طاهر ..!!

أيه .. أجل ..

 وش هو الصباح بدونها ..

وش  حيلة الما 

والعطش بنيان هم 

وغربلة شمس ..

وأماني .. تحترق في روح شاعر ..!!

أيه .. يا طعم المسافه ..

بين ترتيل الوجع

وابتعاد النور في حلق الحسافه ..

ألف صوت .. وكسر خاطر ..

كسر ماملّ الحناجر ..

يهتويني .. يحتريني 

كل ما غبت بجفا 

جا بكل أحساس كافر ..!!

آآه من حلم المسا

والصبح حلمه ياعسى ..

آآه لو جوني سوى ..

كان بكيّت الغياب 

وحن لي .. مره

وعاش الحلم كاسر ..!!

أيه يا أنثى المسا ..

يا ياوفود الهمس .. ياكل المشاعر

تعرفين أني بدونك ..

رمل .. ساحل .. 

جفت أيدينه عنا

ابتعد عنه الهنا ..

في جزيرة للتعب ..

 يركض ..ويركض 

داخله فوضى .. خناجر  

في عروقه بعض ريح ..

وفي عيونه .. رسمتين

وتمتمة دمعة مسافر ..!!

يا حبيه ..

ياقريبه ..

أقبلي .. ولا أرحلي ..

لاتزيدين المسا غربة مسافر ..

تكفيني .. جروح الباب 

فراق اصحاب ..

عض أنياب .. همّ .. 

وزلزلة ميزان قلب .. وحظ عاثر ..!!

ألف عم ..!

سجل التاريخ بيد وبيد ينزف دم دم

والقلم ماعاد يكتب غير دمع وأمنيات

للعروبة ألف كاذب وللمهانه ألف عم

 وللتراب وللمآذن صوت يجليه الثبات

طارت طيور المحبة فازعه نار وحمم

 والدما ترسم خريطة والقلم كل الجهات

يرتفع واطي ويسقط طفل ماخان الذمم

 وينكسر مليار خاطر وابتسامة خبل جات

ياعرب وين العروبه وين ترتيب الهمم

 وين صوت الحق فينا.. بس أسماء وصفات

وربي أني اخجل اكتب والقلم يضحك وهم

 كيف نكتب وصف ذل ...وكلنا كومة فتات

هم عرب واحنا يهود  ويخلق الله من عدم

 كيف أو ليش أحترقها .. وانثني صمت وصلاة

كلنا صرنا عراقي مات مات ولا انهزم

 كلنا في صوت واحد ( ..... ) طعم الحياة

كلنا عملاق نايم .. بس مافينا قزم

من جبل طارق بنسري .. لا خليج القاصفات

يا أبو متعب فديتك أعطنا صوت ونغم 

 وابشر بنصر العروبه.. نصر دين وملهمات

والله ان الدم يحرق والعدو ماله علم

 ودنا نهدم ونبني ..وانت راع الأولات

كل ابوهم يخذلونك بس حنّا لك عزم

 أبشر بتنظيف بيت ورفرفة عزّ وغناة

سجل التاريخ فينا يد يد وقول سمّ

 وسجل التاريخ ذلي وانحصار المعطيات

آآه ياتاريخ سجل واكتب التاريخ دم

 لعنبو عيشة مذله تحت قصف الأمنيات

نخل العراق

من يعاني ..!! 

من شرب طعم الأماني ..!! 

من تعدى فوق مرقاب الثواني ..!! 

من نظر بعيون قلبه .. 

واستقل الموت بيده .. 

يكتب العز بوريده .. 

يكتبه دم وأغاني ..!! 

من يعاني ..!! 

من تلاشى من الزمان .. 

وضاع بعيونه أمان .. 

وكل ما شفته يعاني .. 

قلت يارب البشر .. 

هذا هو نخل العراق .. وتمتمة حزن المواني ..!! 

من يعاني ..!! 

غير بوابة أمل بعيون طفل .. 

يموت كم مره .. ولا دمعه بخده .. 

يوم أنا دمعي كواني ..!! 

من يعاني ..!! 

غير أم تموت في الليلة كثير .. 

ولا تصيح ..إلا بأسم الله .. 

وتكتب للصغار .. أنموذج الحلم الكبير .. 

ورقرقة ماي السواني ..!! 

من يعاني ..!! 

غير شعب النهر .. 

شعب النصر .. 

شعب يجاهد الكفار بالسبع المثاني ..!! 

من يعاني ..!! 

غير طير العزّ .. 

من البصرة .. إلى باب النجف .. 

ويمر من بغداد .. ويسلم .. وياصل في ذرى الموصل يعاني ..!! 

من يعاني ..!! 

هو أنا .. أو أنت ..!! 

أو شعب .. الحقيقة ... 

في زمن خايب .. بكل الهم .. 

بارتال الصواني ..!! 

من يعاني .. غيرهم ..!! 

في وقت طوفان الصليب .. 

وهمهمة أفعى كبيرة .. 

تحتري غفوة أمل .. أو حلم .. ملّ من العبث 

بيدين ثاني ..!! 

من يعاني .. 

والنجف والناصرية .. تكتب أحروف الملاحم .. 

ويرتجف منها .. هبيل الروح .. 

خبل الفكر .. شراب القناني ..!! 

من يعاني .. غيرهم ..!! 

واحنا .. مالنا غير الدموع .. 

وسفك حلم اليعربي .. 

لاطار وحده .. 

ينزع أشلائه بهمه .. 

يكتب التاريخ سمه .. 

تحت وبل الصبر .. مكتوف الأماني ..!!

سلسال فكري

سلسال موت أو موت سلسال جايز

 وجايز يكون الفتح سلسال فكري

بين الملامح تمتمة حزن فايز

 وبين الحزن والطين مشوار صفري

مليت غفوة ناس ذل وعزايز 

  والذلّ جنّ وشيطنة حبر سحري

 

تحرير فكر بفكر صنع الخرايز

 من وغد لا وغدين يا كثر عذري

أليا متى والدمّ يرسل طنايز

 أليا متى والدمع مقياس سعري

آشوف وأعما ليلتي والعنايز

 حلم الصبا أو هو صبا حلم عمري

أفرد نجومي والبس الصبح حايز

 عقدين همّ وثوب يجتاح وزري

اسرح بطيشي في يدي وآتمايز

 والعب رجا بالحبل والخصم صبري

حليت حبل الطين عشق وحرايز

 ولفيت عنق الحرف وامطرت قبري

ولامن بكيت آعيش وآموت جايز

 وجايز يكون الموت سلسال فكري

أنتي أنتي كل عام

أنتي أنتي ..

كل عام ... آشوفك انتي

ماتغيرتي بعيني

لو قريتك كل عام ..

برجع أقرا وآتهجا 

واكتب بداخل عيونك

من عبير الوجد جيت

وداخلي شوق وزحاااااام ..!!

أنتي أنتي ..كل عام 

أتي عصفورة فضاي

أنتي قمراي وسماي

أنتي هتان الحقيقة

وانعتاق النبض 

لارفرف جناحك في فضا صدري وناااام ..!!

أنتي أنتي كل عام ..

أنتي أعداء الظلام ..

أنتي ارجوحة أماني 

وحلم ملّ الموت 

في لحظة حزن 

وجا يصحيني بنبرة صدق

ياعمري فداك الجاي 

 جيت أفطر على صوتك

بعدما ملت اعروقي ألم .. جوع الصياااام ...!!

أنتي أنتي .. كل عام 

أنتي جناتي وبوحي ..

أنتي أحلامي وروحي ..

واشتعال اللهفه القشرا 

على روض الجفاف .. واصل تعريف الغراام ..!!

عشق الكراسي

ماكل غيمه مرت الرمل تسقيه

 ولاكل من ينبت على الجال راسي

ولاكل من هدّ التعب فلت ايديه

 الحزن طير وباقي الكون ياسي

إما شربت الهمّ ماعشت طاويه

 نشرب بعض والليل كاسه وكاسي

نصوم في ليل العتب والمشاريه

 ونفطرعلى ماي العنا من يباسي

وآفزّ من صوت العنا فاخر التيه

  واغسل بوجه الدمع بعض المآسي

آطير بعيون السما واكسر اوجيه

 واكسر سديم الذل بيدين باسي

ولا قد كسرني غير عزمٍ يعنيه 

 مساح جوخ أعماه نبض الكراسي

ماملت بعيون الرضا من تجافيه

 كل العرى حلمه وحلمي لباسي

مامال بي غير الشقا غصن طاريه

 يميل بي يوم الثمر وسط راسي

دمعة يتيم أصعب من احساسها فيه

 وياما دموع تعيش محدن يواسي

ثوبه كسره الفقر والغير يكويه

 يمشي ويسأل وين أهلي وناسي

عجوز يرميها الزمن سوط تبكيه

 ترجي حنان الطين والطين ناسي

حسّ الرصيف بهمها واندهش ليه

ماجاوبه غير آآآآه ياوقت قاسي

هذي خطوط النبض والكف تشبيه

 واحد ثمنيه عكس عمر المراسي

الحرف روح وقايد الروح يرضيه

 فتل الحقايق والعطا دبلوماسي

لاهنت ياعمر الظما صب للبيه

 بعض الجروح وجرح غيم التماسي

ضم العروق وتبلّ الجرح واعطيه

 لعب الحقيقة ضمن شرطٍ أساسي

لو كل غيمة مرت الرمل تسقيه 

 ماجفت عروق الحيا بالكراسي

سكر زيادة

في المسافة بين نحر العين ..

وخطوط الحسافه ..

كانت الدمعه تروب ..

ودها ترقا تذوب ..

بس عميل الحلم هز أغصانها 

واتكا للجرح .. حيل

وصادف الليل الهروب ..!!

كان غصة .. وقت 

كان أعذب حكايه ,,

كان يكتب حلم بالما ..

والأمل بيدين ظلما ..

كل ما شبت شموع

وصادف الليل العميل ..

هز ركن ..

وطاح ركن ..

وطار ركن .. 

ولابقى غيره بذاك الركن ..

يتلذذ .. بصوت الما 

يغني .. آآآآآه من يحلم بحضن  ..!!

طعنتين أوجع وربي ..!!

مالها عندي مطار ..

والمطارات القديمه ..

صارت بروحي يتيمه ..

 كلها قصة حصار ..!!

من يجاوبني .. وانا اللي ..

ما بنيت إلا أمل ..

ولا هديت إلا ورق  ..

ولا كتبت إلا أرق ..

من يجاوبني .. وأنا اللي ..

ضاع نصي .. !!

وهو يحاول يطفي الباقي من النص المجاور ..

ذاك ذاك اللي احترق ..!!

يا دفا حرب الإبادة ..

نار ..نار ..

والمسا كله أغاني .. 

ولعثمة حرف وجدار ..!!

آه ياحرب الإبادة ..

من يروض حلم روحه ..

وسط دوامة .. جروحه ..

هو أنا .. والليل عادة .. 

يكتب أحلامي إبادة ..

وسط فنجال الأماني ..  

لا سئلني الليل عنها .. 

صحت فيه وقلت له ..

 روحها سكر زيادة ..!!a

سلمى وروح الما

سلمى بكت عطشى على باب مسكين

 وسلمى على نغمة عشق تطلب الكاس

سلمى يديها ترفض اللعب بالتين

 وسلمى يديها تكتم انفاس وانفاس

سلمى وتفاح القدر يجهل الطين

 وسلمى على حوض الخطايا مع الناس

سلمى مجرد أسم واظن تخمين

 وسلمى وفاتن جايهم قرع الاجراس

سلمى تنادي

يا ألم ..

وتقول  انا قصدي قلم ..

خل النهار يعيدني

طفله

وبيديني علم ..!!

قلت ابشري 

قلت آمري

ياشيخة الحلم الأصيل

ماراح شي 

ولابقى 

بيدي سوى طعم القليل ..

أدري الليالي مظلمه

والنور بيدين البخيل

وأدري خطاي تعلمك

وتأنبك .. وتعذبك

كيف الحزن طعمه جليل..!!

ياشيخة انفاس العمر

ظلي دفاك

وشمسي ازهار الربيع

واللي تشوفينه سحابه

اشربيها

واحضنيها

يادفا ذاك الرضيع ..!!

سموك سلمى .. وانا باقول روح الما

  اسمك تقادم .. لزوم العهد يتجدد

ماظنى اقوى بعادك والفراق اعما

 ولاظني اعيش ظل .. وخاطري سدد

قولي هويتك غصبّ ..ماواطن الظلما

 قولي فديتك وتفداني .. ومن ردد

ياريحة أم اللوز ..

وفراش بركاني ..

لاتهجرين الما ..

مشمش ورماني ..

خليني انسىالغير

واردد الحاني

كل الخطاوي دم

والنور يعصاني

ولاقلت لك ياروح

من رتب اوزاني

قول أمير الطير

جاني وغناني

وحصانه التسبيح

والله لنا فاني

ولا كثروا بالهرج

قولي لهم عاني

قولي يحب الخير

وسلمى وجيراني ...!!

مسلسل التاريخ واضح والبطل دوره عظيم

 والفلاشات الكثيرة .. أعطت الدايخ سنا

قال ياسلمى أحبك .. قبل تأريخ القديم

 وانطبع بعد الهوامش ..دمع سلمى والعنا

هيه ياللي وبل نورك .. ما تعدى للفهيم

 أحسب حساب الرواية .. لانبلج صوت الفنا

لاتحسب البرق بيدك .. وانت ماسك بالهزيم

 الله اقوى يالمعتق .. انت بس خلك هنا 

سلمى وسلمى ..

وروح الما .. وروح الما

من يسبق اليوم 

ويحدد فضاه أكثر ..

أنتم لفيتم نور 

والنور كان أحمر ..

والحادثة هي شعر ..

يوم الأدب .. أجدر ..!!

ياعم قلبي فديتك والنهار أعزب

 والصبح ليلك وليل السالفة أسره

إما رقيت الحياة وصرت لك مكسب

 ولارقيتك ..وعزف المفرده بكره

خل الليالي تعيش وخلني أطرب

 يالعنبوالشعر اذا ماهز لك صدره

عطني من أيام روحك بعضها واشرب

 بتقول يفداك عمري  والصبا يشره

سموك سلمى مؤنث وانت لي أعذب

انت الطهارة مع أنفاسك كذا فطره

أحب نورك ونور السالفه أغرب

أما وطيتك ..!! فسمّ السيل بس قطره ....!!