في بلاد الطيش مين .. كان مايعرف شهد
كان يشرب خمر فكره .. والشقا ماكبله
هو سعد ماغير غيره ..ماتغير عن سعد
ثوبه اكبر من همومه / باتساع المهزله
يغزل افكار ومعاني .. كل معنى له سجد
يلبس الروح اختيار / ولاقطف له سنبله
كل ماقلت أحتفي به / قال : ( ياوجه السعد
مابكينا لجل نلقى .. صعبنا ما أسهله
المدينة بنت عاهر .. جدها ماله ولد
والقرى طفلة حزينه / عارها من يغسله
جيت بانشودة صباح .. آمد كفي لـ الوعد
وخان فيني كل معنى / كنت اردد : مكمله
مالقيت اللي أقوله.. في مداهيل الجلد
كنت في وادي / وغيري مارقا لي منزله
الشوارع صمت فارع .. واللهو ماله عدد
والحصار أصبح مزار / وماشراه إلا هله
ويش باقي ؟ واشتياقي أزرقه ماله مدد
والخيول بكل زهو .. تزيد موت الأخيله
خلني بالصمت طاير .. بس ماحولي هدد
خلَ قيد البال عايش / ليه ودك تعزله ؟
المنافي في عيوني / كلها برق ورعد
والمطر مهما جهلته ..عاش محدن يجهله
غربة الإنسان رحله .. في حياته للأبد
والحبيب اللي توطن فيك .. لالا تقتله
عش مماتك في عيونه .. لاتموت بلا سند
يكفي أنه هو وطنك / وفي دماءك تحمله
لاغفى شريان حبك / غيرك بطيشه صعد
خل دمعك كل طبعك / والدموع بـ تخجله
خذ كلام الروح يمكن / فيك بركان وخمد
وخلَ مايمكن تقوله .. في صفاتك واخذله
الشعر .. ماهو بـ غايه أو مسافه لـ الجسد
الشعر .. أكبر من اللي تفهمه وتحيد له
الشعر .. روحٍ تطير جناحها يومه فرد
مالحقه اللي توسَم .. والبحر ما لد له
الشعر دمعة مسافر / طعنته غربة بلد
والشعر دمعة حنين / وملحها من حن له
الشعر غربه .. وحربه تبتدي فيك بكمد
نارها فكر العروق / وجمرها له زلزله
الشعر أوطان جوع / وعيشها مابه رغد
الشعر آخر جنونك .. وانت تبكي باوله
لاتساءل عـ الثياب / وكن ماحولك أحد
يكفي اللي في عيونك .. " والبقا لـ المرجله "
هاك بعضي لجل بعضك مايسميني سعد
سمني سيل البلاد .. اللي نسته السنبله ..! )
ليست هناك تعليقات:
إرسال تعليق