هذا أنا من دون بشت وكراسي
حتة مواطن مالقى له جناحين
لي راس مال وكل مالي براسي
ماغير ألون هالسما بالتلاوين
أشوفها زرقا وهي كل ناسي
وأحيان ألونها بلون المساكين
واحيان أحس ان البشر ماتواسي
واحيان أواسيهم وانا مالي ايدين
كل الدروب غروب والنبض فاسي
كني مسافر ماقرته العناوين
غريب متوسد عذاب المراسي
والانتظار يعيدني طفل تشرين
أضحك وانا في قمة الحزن راسي
مثل الجبل وأحيان مثل الشياهين
صبيت ذاتي في مزاج التناسي
وشربت معنى الحلم بين الشرايين
والواقع اللي مافهم من حماسي
عليه تعويذة فروخ الشياطين
وان كان مايعرف شموخي وباسي
الأرض له وآآنا السما والسلاطين
الغيم يسكر من حروفي وكاسي
والشعر عطرته بكل البساتين
روضت خيل الوقت لو كان قاسي
والعمر مايحسب بكثر الدواوين
يكفيني أكتب للمسا والمآسي
ويكفيني آآلون وطن داخل العين
هذا أنا وان ضعت ماضاع راسي
وان كنت ماتدري أنا الصبح والطين ..!!
ليست هناك تعليقات:
إرسال تعليق