كتبت في البال : وينك ؟ ضعت ياعمري
تعااال أعلمك عنك وقول : لاوالله
تعااال أبهديك كلك في وسط صدري
ونشكل الغيم دوله باسم : عبدالله ..!
العاصمه روح تحيا بالسما تسري
تضم روحين / قصدي .. نبضنا كله
بين السحايب تطير بشوقنا العذري
تقتات بعروقنا .. والدم تحتله
ماتشرب إلا من أنفاسك ومن صبري
فنجال كله غنج متماسك الطله
النور داخل عيونك مشعله جمري
آولع النور واشكي منه وآعله
وش ينكتب فيك ياذوقي ويافجري
وش للشعر من مصافي وانت له دله
تمشي على الأرض / فيك الأرض ماتدري
ترقا على الغيم / والخطوات منحله
كأنك الما بخطواتك معي تجري
تنساب مثل الخيال وطيفك تسله
لك جاذبيه تهز الكون وآهذري
كل النسب من جمالك صابها خله
هدبك ذايب غرام / ونونك السحري
النور بابه ورمشك حده وظله
ملمس خدودك يشابه ملمس القمري
أو ورد محدن قطفه بحسنه وجله
أدري بخصرك وش افعاله ولا أدري
مسحور به وارتوي سحره ولا آمله
يميل بي غصب لين يطيح بي جدري
ولا اعتدل ضعت فيه آدور الزله
كلك على بعض سكر ذاب في نحري
غصيت بك من حلاك وصاحبك من له ؟؟
أنت الثواني معك ماهي على خبري
كل الثواني خناجر موت مستله
اسطورة ابداع لوحه حسها خمري
والخمر كله بخل يذوب مع خله
فيك الحكايا سلاسل نورها يطري
يعني من الله لك هيبه ولي عله
أنت الملك وسط دوله نبضها صدري
تعال أعلمك وشهو حضن عبدالله ..!
ليست هناك تعليقات:
إرسال تعليق