ثورة سحايب

ما أملك إلا الأمل في قرب خلاني ..

اشوفهم في عيون الحلم وقصوره

احسهم في عروقي نبض وجداني ..

حتى السحايب بهم والأرض ممطوره

كأنهم لوحة الما داخل أغصاني ..

وانا جذور المسا والريح وعطوره ..!!

لاقالوا الناس عاشق قلت وحداني ..

ماغير هذا الجسد مطعون بسروره ..!!

الروح راحت بعيد ودوم تعصاني ..

مع محبين قلبي تعلن الثوره ..!!

ثورة سحايب لها أول ولا ثاني ..

ثورة من الما على صحراء مقهوره ..!!

ليت الحبايب رموا بالبال عنواني ..

كان استفزيت كل النبض وبحوره ..!!

في خاطر الليل كل الحلم أوطاني ..

وفي خاطر الصبح مايبقى ولا اسطوره ..!!

جيش الأمل يسرق الأنفاس باحضاني ..

ويرميني بكل قسوة ذوق بالصوره ..!!

ليت الأمل يوم جفف خاطر أحزاني ..

 أهداني النور قبل يحط دستوره ..!

ليت الأمل مارقا لعذوق وجداني ..

وياليت روحي تجي بالحب ممطوره ..!!