كذا تمدن جرح والخاين ضمير
كذا يضيع انسان والعزه رداء
كذا يموت الحلم بجيوب الفقير
كذا يعيش الموت والعذر ابتلاء
كذا خيام الطيش مفروشة سعير
كذا عمود الحال معناه انكفاء
كذا كذا يعني أماني من زفير
تصعد مع نزفي إلى آخر سماء
ويحتال بي غيم الهزيمه واستدير
وارجع إلى أرضي مكلل بالعطاء
واجتاح بعضي لانوى حلمي يطير
وآفل جنحان الأمل طيب ورجاء
والقى بشارع بيتنا زحمة مسير
والقى بشارع بيتكم نفس العناء
واسأل عيون الناس عالأمر الخطير
وآمشي بقلبي والدروب بلا حياء
والقى حياة انسان راحت للكبير
صغير مات بواسطه/ غبن وعراء
واحلامه الخضرا لقت نفس المصير
ليل الوساطه أغنية واللحن جاء
هو ليه مازار الصبر والصبر خير
هو ليه ماحنَا كفوفه بالوباء
هو ليه مايرقص على صدر الحرير
هو ليه ماينطق نعم من غير لاء
لاهو وقف في موقف الحرَ الضرير
ولاهو مسح جوخ الغبا للأغبياء
انسان راح وراحوا اشباهه كثير
على رصيف الواسطه صف العزاء
أيام سودا ماءها في وسط بير
والدلو بكفوف الفقير بدون ماء
يبني من آماله جبال بروح خير
والشر يهدم مابنى ظلم وجفاء
ياناس حنَا ناس محنا شي غير
ياناس بسأل ويش معنى الأنتماء
الإنتماء أنك وطن شمسه تنير
يعني وطن داخل وطن دون التواء
الإنتماء تعيش غصن لكل طير
لا فرق .. لاتمييز واو .. ولا انحناء
يعني ضلوع تظلل ضلوع الصغير
يعني .. سنابل حب تتتمايل وفاء
يعني جبارة حلم في بسمة كسير
يعني عرق يكتب حروف الإحتواء
كذا يموت الجمر باهداب الحصير
كذا تعيش الأرض تثمر بالضياء
كذا يموت الجرح والوافي ضمير
كذا يعيش الفرد معنى أنت ماااء ..!
ليست هناك تعليقات:
إرسال تعليق