ظلم الحنين

الليل مايوفي من الحلم ذره ..

وشرياني المجنون للذاكرة باب ..!!

ظلم الحنين أمطر على الحال قطره ..

وابتلت عروقي مواويل واحباب

غنيتهم فيني مثل كل مره ..

 اللحن روح وخاطري عود زرياب .!!

اشتاقهم والدمع مافك حسره ..

يزيد جمري والضيا صوت غياب

 

والبرد ماهون على البرد جمره ..

كل الفصول حمول والوقت حطاب ..!

الجرح عيّا يكتمل يوم عذره ..

في كل لحظه جرح معجون باسباب ..!

ملح الخطا ماملّ يقتات صبره ..

وملح العطا مامرّ ذوقه ولا طاب ..

حبك عيون ولا سمح لي بنظره ..

إلى متى والليل نحسب له حساب ؟

تدرين أحبك حب نافذ بسحره .. و

الغيم من فتنتك هامل ولا ذاب ..

هو يحتري منك الفرح والمسره ..

وانا احتري قلبك من الذنب لاتاب

تعبت اشوف الموت في كل زفره ..

واحيا أمل كذاب في وقت كذاب ..

إما تعالي يطفي الجمر جمره ..

ولا فديتك سافري بفتح الباب