الأسم : " حتة مواطن " عاش بـ جبالك
واللون : " حنطي " وحنطتنا عزاوينا
العمر : ضايع واذا حبيت خذ بالك
عمرك : سفينة أماني ضيّعت مينا
هذي بطاقة شعر .. ببطاقة أحوالك
واختم عليها بـ ورده ضايعه فينا
تعال فيني .. أبقرا اليوم فنجالك
واعلّمك كيف .. رحنا بس ماجينا
الما حواليك وأنت تعيش ترحالك
غريب تمسك غريب .. وضاعت ايدينا
كف الأماني أكله الصمت بـ آمالك
ولا باقي إلا كفوف الصبر تاوينا
إلى متى وانت تحرث بالسما فالك
إلى متى ساحل الغربه .. قوافينا
كل الفراشات عند الضوّ تحتالك
والظل مافيه أحد : ياكود راعينا
الحزن يلبسك وانت تخدد شمالك
وشماغك يلف وجهك : مثل امانينا
لاتحسب انك لحالك .. منت بلحالك
الحزن ماينستر بشماغ يآآخينا
مفضوح غربه : حنينك همّل حبالك
والباب له ذاكرة لو عاش ناسينا
خذ من فتات المواجع خبز لعيالك
وانثر زهور الجفاف بليل مشقينا
كلّن يسامر غلاه بليله الحالك
واحنا نحاول ولكن : كيف نرضينا
ماعاش صبر الشراع إلا بموالك
ولا غرّد القمري إلا من هقاوينا
تعال نسكب حنين الصبح بـ دلالك
ونضحك على الحلم في عثرة خطاوينا
تعال نعجن بقمح الذاكرة شالك
ونشوف عدنان كيف يموت في لينا
تعال نضحك قهر في زحمة جدالك
تعال نملا فراغ احساس مالينا
ولا مرّ حلمك معك ولاّ تهيا لك
أكتب " فديت الوطن " وانسى أسامينا
ليست هناك تعليقات:
إرسال تعليق