حكاية الحاكم بأرض اللاخليل

على باقي ظلالك 

قمت حالك 

أسأل الليلة : 

من اللي يقطع الثاني ؟

أنا والشوق نقطع هالثواني ..

أو الوقت المسمم ..

يقطع انفاس الخيال وعطر شالك ..!

من يساومني عليَ

ويهدي المعنى تفاصيل احتلالك ..!

من يعلمني ..

وش اللي باقي بهم المسافه ..

لابدا يسهر على حمى وصالك ..!

من دلالك .. 

أبني جنون الجنون ..

بحكمة العاشق ..

وبعض أجزاء بالك ..!

منك .. من فوضى خيالك ..

من تعاويذي / ومن كلي

لك صنوف الحنين ..

وبعثرة أرضي سماي 

ولهفتي .. صمتي .. كلامي 

قصدي أقول : المطر كله حلالك ..!

واشتاق ..

همسة روح ..

في ليلة مطر .. وانتي لحالك ..!

فيها حنيني ..

يطعنه سيف الكلام 

يسافر بكلي ( يقين )

ويهمس بصدري صدا :

لك كل أسراب المدى

هذا المدى لك ..! 

 

أشتاق واتساءل / متى نمحي الياس

من دفتر الأشواق .. ونعذب  الليـل 

تعبت أمر الصبح / والناس هي ناس

ودي تكون النـاس / ورد وأكاليـل 

ودي أطيَر بالفضا شـوق الانفـاس

وآعلَم طيور الجفـاف /  المواويـل 

ودي ألم الكون في لحظة  احسـاس

واهديك كلي .. والبقـا بالتفاصيـل 

ودي وودي .. لكن الحلم ألماس ..!

وآنا فقير / وكل ما أملـك السيـل 

 

ليلة وتتمايل غصون .. ولا يمون .. غير أنتي بحزنك .. تفاصيلك ..ولمعة شوقك السافر .. 

تسافر بي مع ريح المسا .. روح وأسى ..ماخلت طيوري تبات .. ولا ممات .. 

ولا سكن في صدري الماثل بصدر الليل غيرك وانتمائي لك .. وطن يسكن وطن .. 

همسه نشيده .. زحمة اشواق وعنا .. بللت هذا الطريق المرَ لامرمر سمائي ..

وامطرت دنياي : خيلك في سباق الموت ميل ..!

ومن يميل ..

كفة الأشواق ..

ولا كفة الوقت المسنن / رمح

في خصر العليل ..!

من يعاند من ؟؟

بليلة سافرة موت ومسيل ..!

من يحضن الدمعه 

ويسألها : متى السكر بديل ..!

من يسقي أطراف اشتياقي ماااء

يهديني بياض العمر ..

قبل الشوق مني يستقيل ..!

ليه هذا العمر مايسمع ؟؟

وانا صوتي جرح كل السحاب

وأمطر الصمت الصهيل ..!

من يكسر اضلاع السما ..

يهدي سماءه للحنين 

وللجنون العاقل ..

الساكن ببال المستحيل ..!

هو متى الغيمة تلم ذنوبنا ..

تبكي على صدر الأراضي 

يبتهل منها صباح .. 

يلمني ويموت ليل ..!

(من وليه وكيف )..ظلما ..

بها ولعت لحظاتي مطر

كانت على مرمى سؤال 

تمرني وتغيب 

في ليلٍ يراودني على موتي .. 

ويجرحني وأعيش اللامثيل ..!

واشتاق لك .. للما .. واصير حكاية الحاكم بأرض اللاخليل .. ولادليل يفند اصوات البشر .. 

وآنا لحالي في مدينة يأس تستسقي جفاف الهيل كل الميل .. والناس بدفى صوتى ممات .. 

مابقى غيري على قوس الرئاسه والكياسه تصنع المعقول خنجر .. يحكم أجزائي .. قدر مكتوب .. 

دون ذنوب دام العشق مفتاحه سما روحين طاعت والمدى طير وجناح ..!

 

مشتاق لك خاطري مشتاق

ياروح وش عاد  بيدينـي 

سيلت لك بالسمـا  أوراق

واغصان من لول ترضيني 

عصفورها بلـل الأريـاق

غيمه من اقصى  شراييني 

تطوف بي داخل الأعمـاق

وآحس بـالما  يخاوينـي 

وسالت على كفي الأشواق

وامطرت بسؤال  يكوينـي 

ليه الأمل يسكن الأحـداق

ليه العناوين فـي عينـي 

خذي عيوني بدون فـراق

يكفيني آحس بـك فينـي 

 

1

2

3

أحبك ..!

أحبك كثر ماصبري يخليني .. أحبك حيل .. وانتي السيل .. وآآآنا في متاهات احتيالي للثواني 

أعترف أني مجرد روح تعشق روح .. توأم روح .. قبل آروح يكفيني أحس ان الجناح أطول 

من الليلة .. ولا حيله من الأشواق في ليلة مطر فارقت بك ظني وخاب الظن .. إجابه / تمتمة /

صبح / وغواية فن .. مساء ونور .. وليلة تسقي التنور .. بعضي واحتفل في بعضي الباقي سؤال ..

واحتمالاته بحلم يثور ..يتمايل ويتساءل متى نصطف في ساحل غرام الحلم .. ونكتب للضيا 

متنا وعشنا الليل ..ورياح الأمل تعصف ولا يعطف علينا غير تفاح السنين المر .. والسكين أنا مشتاق ..!