صففي جرح النوايا واستعيري كل نور
مابقى للروح باب ولا بقى حولي جدار
علميني كيف ببدا والفضا كله بحور
علميني كيف بحيا والغرق نخب البحار
علميني كيف أموت ولايبكيني حضور
علميني كيف أغيب وكل هالدنيا حصار
علميني كيف حبك ذاب مابين السطور
علميني كيف حرفي يكتب الجرح انتظار
الزمن كله اصابع والثواني ما تبور
تزرع الخفاق ملح وينبت بصدري فنار
نار مدري نور لكن كلها زحمه قبور
والعزا بين الحنايا يشبه لـ موت النهار
أعترافي مايكفي والخطا ذنبه يثور
يهدي النجمات حزن ولااسميه اعتذار
اعتذاري هو غلاك ولايعليه الف سور
دامه اكبر من خطايه كيف بـ آعلق مدار
قدرك بعيني وعيني مالها عندي مرور
تلتحف طيف الليالي تحلم بآخر زرار
حلم ولا علم مدري لكن الأحلام زور
مايهمك لو يضمك جفن خاواه الغبار
سلمي عيني لعيني ثم غيبي بالحضور
الغياب الليل وانتي كل تعريف النهار ..!
ليست هناك تعليقات:
إرسال تعليق