يا صباح الياسمين وياسمينك
علميني وش علوم الياسمين ..!
الصباح اللي تنفس في يدينك
ذاب من كثر اشتياقه والحنين
السنــين الليل ... والقمرا جبينك
والضيا ماعاد ترتيب السنين
أسألك باللي خلقك شلون طينك
من تراب وماء ولا ماااء تين
الغلا يحيا غلا .. والقبر عينك
كيف بآشوفك وكلي وسط عين
خرجيني من عيونك في يمينك
لجل أمتع ناظري وارجع دفين
الصباح أقسى من الغربة .. ولينك
ماسقاني غير صبر ودمعتين
السما تمطر سؤال .. يقول : وينك
والأراضي تسأل : الأحلام وين .!
كل هالدنيا زحام .. وفاقدينك
كل هذا الفقد .. مزحوم الأنين
الحزن مامرّني .. يشبه حنينك
الحزن يسكن صباحات الحزين
الضيّا بـقيوده العذرا سجينك
كل هذا الكون : ظل وشمعتين
شمعة أشواقٍ تبلل راحتينك
وشمعة الغربة وموت الحالمين
الطريق غياب والمعطف سنينك
والخطاوي صخر عيّا لا يلين
أيه أنا ماني أنا .. ياكثر دينك
أي دين أطلبك بالله أي دين ..!
ليست هناك تعليقات:
إرسال تعليق