خيال مجروح .. طارت به ..عصافير
والدمع .. لليل / والخاطر / والاشجار
قالت: تطير بجناحك ؟؟ قلت : ما اطير
أنا مكاني ... وطارت ... زحمة افكار
جناحي كسيرٍ بتقدير المقادير
عليه : دمعه / وسرب جروح ماطار
يتشجّر الهمّ .. نار .. بعرق .. ويغير
والدم ... يحرق جروحي .. كل مافار
الحال واضح .... ولا يحتاج تفسير
يموت الابطال غدر .. وتنقص اعمار
الشيخ ياسين / مات / بصوت تكبير
الله واكبر .. صداها .. حزن وامطار
أشوف نفسي / بكرسي الشيخ تصوير
لانا حميته ... ولا آنا ... سالم العار
بكيت له غيم ... يتسامى .. على زير
ياكيف هذا التسامي ..؟؟ ليل ونهار
هو مات ؟؟ مامات .. لكن كان تحضير
للروح ... للدم ... يعني نور من نار
هذي هي القدس جرح .. بدون تشبير
وبغداد .. في كف ليل ... وسوط كفار
أطفال دجله .. دموع ... بزحمة السير
واطفال غزه.. شموخ .. بيد واحجار
الحزن..!! نخل الرصافه.. والرطب غير
يمشي على الليل ... للأقصى وينهار
هذا الرطب مرّ ..!! والسكّر ... معاذير
ياأمّة العذر..!! ماباقي ولا اعذار ..!!
كم مرّ فينا أسـود ..؟؟ وكم أساطير..؟؟
صلاح ... مالاح... والمنصور مازار
كم نشرب الذل ...؟؟ بيدين المـسايير..
شارون يسقي ... وحنا كاس واحبار
كم نربط الخيل ..؟؟ كم نكتب تعابير..؟؟
كم للرسن يدّ ..؟؟ كم للحبر أنهار..؟؟
اليا متى الحلم ..!! لوح بلا مسامير..؟؟
لانا لقيته... !! ولاهو حصل جدار ..!!
اليا متى الصدر.. !! جدرٍ للمشاوير ..؟؟
اليا متى القلب..!! لوح وفيه مسمار..!!
قلي متى ..؟؟ والحريم تشق ازارير...؟؟؟
قلي متى ..؟؟ والكفوف بدون أزرار..؟؟
صمتي ... ذبحني ... ونجمي لاح في بير
أسقي ضمايه .. واردد وين هالدار ..؟؟
لا .. لاح صبحي ... وكني وسط اعاصير
أوراق غبرا.. تناثر .. جرح / وغبار
لاشمس بيدي ... ولا بيـدي أزاهير ..!!
اصابعي ..!! نور جرح / وزحمة اقمار
باقولها ... للرجالٍ .. اللي بها خير ..
لا خير فينا ... وهذا الموت يختار..!!
إما ... نكون الجباره ... لاي تكسير
ولا.. لبسنا السواد .... بكل مسفار..!!
إما ... بنينا قصور العزّ .. ونطـير
ولا.. نطير بسما التاريـخ والعار .....!!!
ليست هناك تعليقات:
إرسال تعليق