السؤال السيف ..والموت الإجابه
والإجابة روح /مرمرها السؤال
الكلام الطين .. والسمع السحابه
والمطر وصل السحابه بالرمال
للشقا رحلة .. وللسيل اغترابه
المسا وادي عنَا / والصبح فال
كم سقى ورده ؟ وكم بلل كتابه؟
وكم كتابه فاض بجروحه /وقال
رحمة الخالق أمل ينفك بابه
ورحمة المخلوق كنز بدون مال
العيون حروف .. واقلام الغلابه
تنكسر .. بين الحقيقة والخيال
لا جنون ولا هدوء ولا رتابه
دام هالغربة بنت مني جدال
كم غريب يعيش بـ عيونه ترابه
وكم من الأرواح غربتها جبال
واقع الأيام مرَ / ولا غرابه
الرجال البحر / واللولو خصال
كم رجلّ ظله حياه ويعتزى به
لو يموت الرجل .. ظله لايزال
وكم رجل ظله تعلق في ثيابه
مات ولاّ عاش .. ماحوله ظلال
الرجال افعال .. واشكالٍ تشابه
ولا يفرق بينهم .. غير الرجال
والزمن خيله تراوح مع كلابه
والثواني حزن ليه الحزن طال؟؟
نصّ صدري ممتلي / همّ وكآبه
ونصّه الثاني .. ( فراغ الأنثيال )
أستخير الصمت باحبار الكتابه
صمت صاخب والشرايين القتال
واتسامى حلم لوعني سرابه
لاحفيف / ولا رفيف / ولا مجال
كل مامريت صدري واحتطابه
غصتي جمره .. وريح الجمر بال
مارجيت الموت لو طوّل غيابه
ولاقبرت الصبر بـ عيون المحال
ولا نسيت الحلم والأطياف غابه
يستظل بطيشها بعض احتمال
السؤال الطير.. والبرقع إجابه
ولا نهاية من ( فراغ الأنثيال..!!)
ليست هناك تعليقات:
إرسال تعليق