ساعة الحزن .. يا أحمد بليا ثمن
يكفي الغصه اللي .. ماوراها فتيل
كل ماناح ضلع .. آآقول هذا رسن
واثر خيل المواجع / تستلذ الصهيل
بالحنايا شموخ ... وفي يديني كفن
قبرالاحلام / شيخٍ .. مالقى له مثيل
في وقاره تشوف العمر / لحظة شجن
وفي هزيمة خفوقه ... تمتمات القتيل
يا احمد الليل مايرحم ... ولابه / وسن
جمرة الوقت .. تروى من / عذوق النخيل
الرطب ..! من جنى صبري / بطعم الفتن
العطايا رزايا .. وش بعد لي حصيل ؟؟
من ذنوبي / قريت اسمك .. بمعنى وطن
ليتني .. ماقريت النرد / بيد العميل
غفلة الاحتمال / أصعب من أية محن
وفي حسابات روحي / عشت للمستحيل
اشرب النور باحساسي / وحولي مزن
ماشربته .. لجل مـ اروى بكف الذليل
يااحمد آمالي أكبر .. من شموع انطفن
واصغر أحلامي / أكبر من جبالٍ تهيل
الزمن يااحمد أمسى غبن / ماهو زمن
هو عبث للأماني ... في رواية رحيل
هو غنى النفس / والطاعه / وحسن الفطن
واعتدال المبادي ... لا بدت لك تميل
يا احمد اوصيك .. لاتركب جموح الغبن
خلك اكبر صغير .. اليا قضبت القليل
عاشر الناس باحساسك .. ولا تفتتن
لا تصاحب هبيل / ولا تصاحب جليل
عيش مابين أرضك والسما وسطهن
وداعب النجم .. لجل تكون دايم دليل
لا انتصر بك خفوقك / قول محدن ضمن
ولا انهزم بك زمانك / دوَر أقرب خليل
خلك أعظم بسيط .. بوحدتك واستعن
وخلك ابسط عظيم / بعين ربعك وشيل
ولاتخلي كلام الذات .. بك ينسجن
ولا تخلي كلام الناس .. همٍ يطيل
خذ من اقصاك شمسك / بين فرض وسنن
وخل عنك احتمال الظل .. مهما تخيل
يا احمد / الليل ..ماخلا بعيني سكن
كن ليلي / هو الخاين .. وانا به دخيل
وان بدت لي نجوم / أغزل بحبك وطن
يكفي أنك وطن .. خذني بـ " شكراً جزيل " ..!!
ليست هناك تعليقات:
إرسال تعليق