وطن وآفك صدري للفضا عاني بسرب طيور
وطن وآطيَر الأحلام لجل آعيش متهادي
وطن قل بس وطن ويشع بالظلما رفيف النور
ويتسامى الفجر بارواح ملت ليلها السادي
وطن وآشب أصابيعي ضيا وآلف حول الدور
واقرا في عيون الناس صبر وعشق متمادي
سالت الشارع الخلفي متى كان الفرح مشطور
وجاوبني على رتم الجروح وملحها البادي
شف المعنى على حضن الصغير المهمل المنثور
شف انياب السنين اللي حضنها حلم الاجوادي
نصفف حلم فوق الحلم .. نبني بالسماء عبور
ولا نلقى من الأحلام .. غير الغربه تنادي
أغاني صمت في حلق الغريب الوافي الممطور
يلحنها المسا حسره بصوت يردد بلادي
بلادي كم نظمت الصبح أماني وانحنى ديجور
وعلقت الضيا بعروق تبكي صبحها العادي
بلادي مارضيت آكون دمعه لو بكيت شهور
ولكني رضيت آبقى جبل والظل للوادي
بلادي كم يسمونك ولكن أسمك المشهور
بلاد النور ياشمس الحنان وحضن أولادي
ايا أغلا وطن ياللي غلاك بداخلي معمور
ايا كنز الضمير اللي يبيع الكل ويفادي
لعينك بس أنا بكتب ولعيونك هدمت السور
ولجنون الحضارة جيت أعقل ثورة جيادي
وطن كلك غلا دام الغلا من سيرتك محفور
ضلوعي قصرك ونبض القصور يحقق مرادي
تمدن ياوطن وحدك بقلبي واكشف المستور
وعلَ الما سحايب حب تتنافر مع اضدادي
تلاقا هالسحب فيني وبرقي ماعليه قصور
شف الأنواء تتزمل و تمطر مائي الهادي
غصون البال ماخلت عيوني بالجفاف تبور
ولا مليت من جور الرياح وليلها الحادي
زرعت الحلم في خد الحقيقة سنبلة مقهور
تميل وتحتفل بالموت دام الحلم جلادي
أحبك كثر مايفرح صغير بلعبته ويدور
أحبك دمع قبل الشمع يتمثل بميلادي
أحبك كثر مايبكي فقير وينتشي مخمور
أحبك كثر ماريح الجنون تميَل شدادي
أحبك كثر مانفسي عزيزة والعروق تفور
دروبك في شراييني تمر وطيفك زنادي
أحسك تشرب عروقي وينبت بالفضا تنور
ويتسابق عليه اللي كرهك وكل حسادي
أحبك ياوطن واللي خلق فينا سماح وجور
مكانك من زمانك فوق يازادي وزوادي
تعال اجمع معي وردي وجفف دمعي المقبور
تعال بنحضن طيورك سماك بصدري الشادي
تعال وزلزل عروق الجفاف وعلَ كل البور
تعال وطيَر اسراب الحمام ولملم حيادي
تعبت آفك لك صدري واطير بالفضا عصفور
تعبت وشهقة الغربة وترها آآآه يابلادي ..!
ليست هناك تعليقات:
إرسال تعليق