تعالي أقري على برد الغصون " الدفا "
وتعوذي مـ الغياب .. وبللي مطلعي
انا هنا بين سكين الجفا .. والجفا
لا هزمت الرياح / ولا فقدت الوعي
وكل ما قلت لـ الغيمة كفى .. ماكفى ..!
والمطر لا نفيته / ذاب فيها / معي
واقفٍ بين حد النور .. حلمي غفا
لاصحى قلت وينك / قال هاك اصبعي
أقطعه / واكتب بدمك سطور الوفا
واكتب .. ان المطر ماجفَ من مدمعي
شوف جمر الغياب يعيش .. ماقد طفا
يوم رمَد فرحت / وعاد بين أضلعي ..!
وتعود غصة ليل .. تبدا بي مشاوير الحزن من شرفة الغيَاب .. لأول باب .. غنينا عليه أغلا
مواويل الأمل .. يوم انتصف حظي مع حظك وداعبنا العروق .. شروق .. طيَرنا أمانينا على
آخر مدى .. كانت بداية .. والنهاية رجفة الحاضر مع سم الغياب .. وصورة الآتي .. مساراتي
مع حلم انجرح في شارع الغربة وبرد الراحلين ..!
الصوت راح / وباقي العطر ماراح
وش حيلتي ؟ وانا تعبت العب النرد
أحرث سماك .. وتنبت الغيمه جراح
عين الضمى .. تختال في شفة الورد
شديت ركب الأسئله .. وانت مرتاح
ولا لقيت الا العنا .. ينقش السرد ..
ياحلم وينك ؟ كل صبري معك طاح
وماطحت أنا / شفني على قمة البرد ..!
ويمر بالعقرب أنين .. صوت الثواني والأماني .. واحتمالاتي .. وصاتي .. في هزيم الشوق ..
لامرمر مسائي طيفك المنثور .. عقد النور .. واحساس الزوايا لابدت غبرا وانا في ركنها
ماثل لهمس الليل .. صوتي صرختي : صمتي .. تعلَ أنوائي القشرا .. وكل اللي يكون عيون ..
بدت تحكي قصصها واحتيالات الخطا والصح في حمَى أمل .. جرح أكتمل .. وانتي وانا
عشنا هناك .. بحضن غيمه ماءها عطر انتظار يعيدنا فينا ..ونبدا نحتوي موت المدى ..
صبر الندا .. ونقول ناقصنا نعيش ..!
في سموَ " الليل " وحدي / سيدي وطبوعه
يحتفل فيني .. وفيني / ضعت بين احوالي
لابكيت من الغياب ... آعيد نفس اللوعه
ولا بكيت من السنين ... يمرني ترحالي
واغترب ذاتي .. ولكن / غربتي ممنوعه ..!
وابتسم لـ الكل مرغم .. واحتفي بظلالي
يكفي ان الصمت فيني صرخته مسموعه
ويكفي ان الحزن بيتي / والشموخ دلالي
لاتساءل عن غيابي ... والغياب شموعه
في عيون البعد يرقا نجمها .. ويلالي
سمَني " ماء الحياة " اللي يزيدك روعه
يوم أنا اسميك " روح الماااء " في جوالي ..!
أيييييه ياغابة فرح مالها بابٍ أمين .. والحنين السور وأوراق الشجر .. كثر العمر ماراح ..
وأنتي لي عناوين الغصون وبردها .. وانتي ثمار الصبر نكهة للفراق اللي توشم بالعروق
وصار أكثر من هويه .. والقضيه في رفوف الانتظار .. يمرَها كلي .. وانادي لك ..واغني لك ..
ولا حولي أحد غيرك .. ولا غيرك يعيش الما وروح الما .. أيا كل الفصول الذابلة فيني
انا مدري متى بآقراك بكفوفي ..؟؟ متى صار الفرح أغلا من أرواح البشر .. لاعاشت الدمعة
بخد الليل .. مثل الويل ... نـتهادى المطر .. ننثر أمانينا غذا لـ الريح .. والتجريح .. غصة حلم
في شريان نخله عذقها أنتي وأنا .. والتمر " موّتنا الحنين " ..!
الليل قسمة وقت / والوقت ظالم
واحنّا تعودنا .. الليالي الظليمه
احلامنا كبر السما / والمعالم ..
يموت حلم .. وحلم يبقى غريمه
كنك بحر .. وآنا سفين المسالم
والموج مايرحم .. ولابه غنيمه
دونك غرست الليل / والصبح حالم
ودونك قطفت العمر من غير قيمه ..!
ليست هناك تعليقات:
إرسال تعليق