قيمة الورد

شبيت ضو البال وامطرت ودي ..

وازهر ربيع الشوق في خاطر الود

وحدي أمرر للزمان التحدي ..

واشفق على الاغصان من قوة البرد ..!!

وحدي قريت الما وطاولت وردي ..

ولا أخذت من السما قيمة الورد ..!!

الشوق يقراني ويجتاح سدي ..

كنه كتيبة حرب وانا معه فرد ..!!

ياخذ من عيوني عيوني ويبدي ..

وديع ذنب وداخلي زحمة الضد ..!!

هذا الحنين وكل جزري ومدي ..

 تشبه بدايات الطفوله مع العدّ ..!!

جمره مع جمره ويومي يعدي ..

كن الدقايق قافلة حزن ممتد ..!!

ياليل خذ كل التواريخ بعدي ..

وعطني أمان الروح لاترمي النرد ..!!

بنت النهار بسنبلة طيش تعدي ..

 ولاتلتفت للي كتب حزة الجرد ..!!

تظلم وتقسى كل ماجات تهدي ..

 أهديتها روحي وهي تهدي الصد ..!!

يابنت يابنت النهار المودي ..

هاتك معي نبني تفاعيل للمدّ ..!! ‎

نصنع من اللاصنع معنى التحدي ..

ونعيش كل العمر في خانة الورد ..!!