حصه وخيريه

حصه وخيريه .. سؤال من الظلام ؟؟

 من لهم قبل الكلام..

ومن لهم بعد الملام ؟

؟ومن على كتفه يشيل الحمل

 في زحمة وطن عييت بعيوني ينام .!!

لاأبو لا أم لا معنى حضن .. 

لاشي في دنيا غريبه .. 

والمصيبه لالقيت الحزن ماعنده مكان

 ويسكنك قلب وعظام ..!!

ياتفاهة هالكلام .. 

وياتفاهة جرح عيّا يلتئم 

من قبل ما تسهر على الموت السهام ..!!

الزهور بلا وطن والسنابل في خصام .. 

والمدى أزرق بلون ولونه الأصلي سواد .. 

يابلااااد لامتى واحنا على كف العنا مثل السهاد ؟

يابلاد .. 

مابقى للشر قيمه ولا بقى بالصدر غيمه ..

 كل ما أحصد جروح 

ولازرعت إلا وفا 

منه أكتفا حزن البشر 

وتفاعل الصمت الحرام

يابلاد الحب يا أغلا بلاد ..

ياحسافه .. 

كل مابيدي هديت ولا عطيت إلا من الله .. 

ولا بقى بنحر السؤال إلا الكلافه ؟؟ 

ليه حنا يابلاد

وليه أنتم يابلاد .. 

كلنا في درب واحد تحت جرف وتحت ديمه .. 

والأمل مجنون غيثه 

يمطر بصدري سؤال

 ويحتري موت الإجابه 

كنه يشوف الغلابه ؟

كنه يعيش السحابه 

كنه يعاني معاهم ولا قدر يبني رضاهم ... 

كنه الحزن ورفيقه

 كنه امطار الحقيقه .. 

كنه انسان وفهمنا ..

و أعترفنا

كم سكتنا 

كم لخيل الصمت تتمادى عبث فينا 

وحنا بالسؤال نعيدنا دوامة أحزان وأماني .. 

والمواني رحلة اللاحزن في وجه المدينه 

كم نعاني

كم نشوف ولا نطوف 

ولا نعيد البال بنت أربع طعش 

ولا ولد مثل البلد 

باحساس فقر وصمت مايشبه جنونه 

غير تحويشة عيونه 

من دموع ومن خضوع

ومن زمن تافه تعلا فيه أذناب البشوت ولايهم اللي يموت .. 

المهم الشيك يدخل في الحساب 

والحساب أبعد من عيون المشالح 

بس قريب

هيييه يادنيا الورق ..

بدري على وقت الغرق .. 

آآآه ياحمّى البلد .. 

آآآه كم باقي جلد ؟؟

 كلنا صحرا ضفاف

 ولا طلبت غير  بعض من العفاف 

ولا طلبت إلا وطن ..

 ودي ينام بحضني الدافي

واغني أنا لك .. 

كل ما أملك فدا لك .. 

وكل ما حولي حلالك .. 

وكلنا في بيت واحد .. 

نبكي لدمعة فقير ونحترم أصغير عيالك

يابلد محتاج نور ..

 ضعت فيك

 وكل ماالخطوات تمشي دمعتي تمشي وتمشي 

من عنا دمعه وسور ؟؟

 لامتى هذا الغرور ؟؟

لامتى الدمعة تثور ؟ 

لامتى والليل مايفهم غنانا ؟؟ 

والحزانا ضيف

 وعروقي قصور ؟؟

 لامتى الفحرة تبور ؟؟

 لامتى والحلم دور ؟؟

لامتى يا أغلا بلد ؟؟

لامتى الصمت الهدد ؟؟

لامتى واحنا تذاكر والدموع العابرين؟؟

لامتى الغربه تهين؟؟ 

لامتى والوقت غافي 

والمدى رمله وطين

لامتى حصه وخيريه كثير .. 

لامتى هذا الحصير ؟؟ 

لامتى طير الأماني 

يخفق بصدري وعيّا طول عمره لايطير ؟؟