غطرف التاريخ دم ... وصحت يالفلوجه
وش ورى نوض الرصاص وصبرك المترامي
مابكيتك من فراغ .. ولا رضيتك زوجه
ولا هديتك من عروقي ... غير عرقٍ ضامي
أكتبك والقلب يبكي .. نايحات دروجه
أشبه لطفلٍ يغص .... بموته الإلزامي
دمروك ودمروني ... والعصا معووجه
ما استقام الظل فينا .. والسلاح عظامي
وين بايعنا الضمير .. بعزةٍ مفلوجه
وين بايعنا العقول ... ووين ضاع حزامي
الصليب يعيث فينا .. والبني في فوجه
وانحن رجالٍ رجولتنا... كلاااامٍ حامي
لاخيول ولا حلول ... وخيلهم مسروجه
لافعول ولا ذلول ... وخيلنا ( ........... )
آآآه من (بوش) الرجال .. ومن نعيق علوجه
آآه من موت الرجال .. وصرخةٍ باسلامي
سجلوا نخل العراق ودمعته ومروجه
سجلوا صوت الصبايا والضياع الدامي
سجلوا تاريخ أمة حاضرة مرجوجه
سجلوا كل المآسي .. في رقاب اخصامي
سجلوا عني حريقٍ بالضلوع فجوجه
سجلوا عني ضما قلبي لدمّ اغرامي
سجلوا صوتٍ نهاني ماسمعت هروجه
سجلوا أني بكيت .. ورافض استسلامي
سجلوا دمعة تصيح لقايدي وخلوجه
يا أبو متعب تعبت... ولا كسرت سهامي
خذني بكفك سلاح... وصييح يالفلوجه
ماورى نوض الرصاص إلا عزوم اقدامي ..!
ليست هناك تعليقات:
إرسال تعليق