بعض الغياب اجمل من حضور غايب
غيبي بكيفك .. كان ودك تغيبين
جفاف صدري من عقوق السحايب
الأرض بور .. ولا طرا لك تحنين
شقيتي اضلاعي .. جفاف وهبايب
النزف وقّف والجمر شبّ روحين
ومابين نزفي واحتراقي.. طلايب
وانا بهم عايش وكني .. بصدرين
نصي معي نصي معك / وقت خايب
من يقسم الخفقة ليا جات قسمين ..؟؟
حيرة طفل ..أو هي .. تفاكير شايب
ولا ممالك .. ضيّعوها سلاطين..!!
كانت قصور النبض عطف وحبايب
كانت .. مداين عشق .. مابين قلبين
انهارها .. شوق وعطا .. والركايب
تسبح غرام .. وتشـبه النون بالعين
كان المطر والأرض صوت القرايب
كان الفضا .. معزوفة الجمر والتين
وامست قصور العشق همّ وخرايب
وش حيلتي ؟ والحلم موت المساكين
ليه انتظاري ؟؟ ليه ؟؟ وين الكتايب
وين الجيوش بصدرك اللي تقولين ؟؟؟
وين الغرام اللي له سنين ذايب ..؟؟
وين الطموح ؟؟ ووين أسرابنا وين؟؟
ياغاليه .. ما للـغلا من سـبايب
وما للجروح إلا .. قبرّ عرض شبرين
الجرح .. ينزف بيننا .. والغرايب
موت الحقايق .. والعزا شال صـوتين
آحس بك صوت وصدى مال سايب
ما يملكه غيري ... ولو جا مــلايين
وآنا بعد .. ميت من الشوق .. ذايب
آحسـني .. طاير .. بليّا جـناحين
العمر يمشي ... والمواقف عجايب
ياموتر اللحـظات .. يكفيك تـخمين
رحّ قلّها / يكفي من الـذل نايب
العزّ ..!! أثمن .. من لقا بين أثنين
الما بصدري نبض .. ماعاش رايب
والحرّ يسطا .. ماسطت بومة البين
يابنت روحي .. دربك اليوم ..عايب
وانا على المرقاب .. سيد الشياهين
فيما مضى .. ذايب / وذايب / وذايب
لاتسألين اليوم ... بالله على وين ..؟؟؟؟
ليست هناك تعليقات:
إرسال تعليق