مرت سنين وذكرياتك على البال
تمر عاشق شمس في زحمة الليل
الله يارمز النصر غبت وانثال
فوق العروق الحزن مثل المعاميل
يشب صدري واتقهوا من الحال
واقول ربي يرحمك كثر ماقيل
مثلك يبوخالد فلاشفت رجال
مايشبهك غيرك بكل الرجاجيل
فارس ولد فارس ولا فيك ينقال
غير العلوم الغانمة جيل من جيل
رقيت شمس النصر واصبحت خيال
جندلتهم ماعاد باقي لهم خيل
ياسيدي مثلك به الحرف يختال
تقصر حروفي عن جميع التفاصيل
منك الوفا يمطر على كل الاحوال
واحنا تشربنا الوفا وامطر السيل
انت العظيم اللي يميل ولا مال
وانت الكريم اللي كفوفه هماليل
النصر بك يرقى ويذكرك لازال
ويذكرك غيره وانت تسقيهم الويل
الله يرحم منزلك كل ما جال
في خاطري ذكرك وهدم التماثيل
علمتهم وشيعني النصر بالحال
وعلمتهم معنى العدل دون تظليل
وعلمتنا حبك وعلمت الاجيال
درس الحقيقه دون صيحه وتطبيل
علمتنا انك جبل قول وافعال
تكبر مع رمي الحجر تشهد الحيل
ومهما أقول اعجز وتعجزبك اقوال
أسطورتك ماتنكتب بالأقاويل
ومهما تمر سنين .. ونعيد الآمال
ماغاب نورك وانت لأرواحنا الهيل
نوعدك يبقى النصر للشمس رحال
بقلوبنا نصرك ونور المقابيل
ومثلك يبو خالد فلا شفت رجال
لامن ذكرتك شبت الشمس بالليل ..!
ليست هناك تعليقات:
إرسال تعليق