فديت روحك كل ماصـاح بـي ليـل
ياشمـس خطواتـي ويانبـض ظلـي
برق الغلا يسبق رعـود المواصيـل
ونوض الحنين يصيـر خلـك وخلـي
أنت المطر .. وآنا على حطتك سيـل
كل السحاب يمون .. ويطيح جلي
فيك : انتصار الذوق .. جمله وتفصيل
وفيني : هزيمة شوق .. تجتاح كلـي
بعيونك ألقى الخيل .. ماتشبه الخيـل
الجفن جامح .. والهدب لـه يصلـي
فيك الجمـال يعيـش حلـو التعاليـل
يامستحلـه صـرت بـه مستحـلـي
فتنتك عزف أرواح من غيـر تعليـل
ماغيرك أحدن طاف بي فـي محلـي
يامستقيـم الميـل بدروبـك تمـيـل
وآحـس ميـل الكـون مامـال ملـي
ماغاب نورك لـو ظـلام التفاصيـل
ماريّح عيوني ولا ارتحـت ياللـي ..
حبك حياة أموات بدروب تضليـل
مابيـن ترحالـي ومابـيـن حـلـي
أسألك قربك وأنـت بعروقـي تسيـل
واشرب جفا دنياي وآصيح : من لي ؟
بين الحنايا طعنة الحـال / تدليـل ..
.. للجرح .. وانت اللي جروحك تهلي
آغيب فيك .. ومنك ماعاد بـي حيـل
أسألك باللي حللـك / مـن يسلـي ؟
دونـك فضـاي آشكلـه بالتماثـيـل
والعـب بنـار الوجـد لافـاح غلـي
خذ مـن عروقـي مايكفيـك تأويـل
ياكثـرك بروحـي .. وياكثـر قلـي
أسأل خيالك عـن جنـون المعاميـل
ويعلمك عـن طعـم صبـري وذلـي
فيـك انشطـاري ماقرتـه الفناجيـل
السكـر حضـورك وعمـري مولـي
وارتـاح لامنـي نحـرت الأقـاويـل
واهديـك منـي كـل وردي وفـلـي
" فديت روحك " لك لحالـك بهالليـل
وانت الوحيد اللـي فديتـه بكلـي ..!
ليست هناك تعليقات:
إرسال تعليق